Корпоративтік дауларды шешудің халықаралық тәжірибесін салыстырмалы-құқықтық талдау: институционалдық тәсілдер және Қазақстан заңнамасына бейімделу мүмкіндіктері

Аңдатпа

Мақала жетекші шетелдік юрисдикциялардағы корпоративтік дауларды шешудің институционалдық тәсілдерін салыстырмалы-құқықтық талдауға және оларды Қазақстан Республикасының заңнамасына бейімдеу мүмкіндіктеріне арналған. Зерттеудің мақсаты корпоративтік дауларды шешудің тиімділігін қамтамасыз ететін әлемдік құқықтық практика призмасы арқылы негізгі элементтерді анықтау болып табылады – мамандандырылған соттардың болуы, арбитраж және медиацияның дамыған жүйесі, миноритарийлердің құқықтарын қорғау және рәсімдердің икемділігі. Қойылған мақсатқа қол жеткізу үшін зерттеу шеңберінде корпоративтік дауларды шешудің институционалдық және процестік тетіктері анықталды, дауларды қарау жылдамдығы мен рәсімдердің ашықтығы тұрғысынан шетелдік тәсілдердің тиімділігіне талдау жасалды, сондай-ақ ұлттық заңнаманың, сот практикасының және институционалдық инфрақұрылымның ерекшеліктерін ескере отырып, құқықтық салада ықтимал қолданылатын үздік тәжірибелер мен құқықтық құралдар зерттелді. Жұмыстың ғылыми және практикалық маңыздылығы халықаралық тәжірибені жүйелеу және ұлттық заңнаманы реформалау бағыттарын анықтау болып табылады. Әдістемелік бөлімде салыстырмалы құқықтық, формальды-құқықтық және құқықтық модельдеу әдісі қолданылады. Нәтижесінде әртүрлі құқықтық жүйелердегі корпоративтік дауларды қараудың тиімділігін қамтамасыз ететін институционалдық және процестік тетіктер анықталды, сондай-ақ олардың қазақстандық құқықтық жүйеге ықтимал ықпалдасу шарттары талданды. Жұмыс корпоративтік құқықтағы құқықтық институттардың дамуына үлес қосады және Қазақстан Республикасында құқық қолдану практикасын жетілдіру жолдарын ұсынады. Практикалық маңыздылығы корпоративтік процеске қатысушылар мен сот органдарына арналған ұсыныстарды тұжырымдау болып табылады.